മനുഷ്യനത്രേ..

മനുഷ്യനത്രേ.....

കൂടപ്പിറപ്പിന്‍റെ മാനവും ജീവനും
കാര്‍ന്നുതിന്നാത്മ നിര്‍വൃതിയടയുവോന്‍

ആദര്‍ശ വാണിജ്യ കമ്പോളം പിടിക്കുവാ-
നന്യന്‍റെ ചുടു നിണം ധാര കോരുന്നവന്‍

രക്ത സാക്ഷിത്വ മേന്മ  പറഞ്ഞെത്ര -
കെട്ടുതാലികള്‍ പൊട്ടിച്ചെറിഞ്ഞവന്‍

 പച്ച മാംസത്തിലുരുക്കിന്‍ കഠാരകള്‍
കുത്തിയാഴ്ത്താനറപ്പു തോന്നാത്തവന്‍

നോട്ടുകെട്ടുകള്‍ക്കടിമയായ്‌ തീര്‍ന്നവന്‍
സ്വാര്‍ത്ഥ ചിന്തയില്‍ മുങ്ങിക്കുളിച്ചവന്‍

അന്യന്‍റെ കണ്ണുനീര്‍ കാണാതെ പുത്തന്‍
കൊലക്കത്തി രാകി മൂര്‍ച്ച കൂട്ടുന്നവന്‍

തെരുവില്‍ കാമ വേറിയോടെ പ്രാകൃത
നരഭോജിയായിപ്പരിണമിക്കുന്നവന്‍

രക്തബന്ധങ്ങളെ കൂട്ടിക്കൊടുക്കുവാ-
നിത്തിരിക്കൂടി ലജ്ജ തോന്നാത്തവന്‍

വര്‍ണ്ണ ഭേദങ്ങള്‍ ചൊല്ലിക്കലഹിച്ചു
ഭിന്ന രാഷ്ട്രങ്ങള്‍ കെട്ടിപ്പടുത്തവന്‍

ദൈവനാമത്തില്‍ തോക്കിന്‍ കുഴലുമായ്
ലോകനാശം കിനാവ് കാണുന്നവന്‍

വെട്ടിപ്പിടിക്കുവാനാര്‍ത്തി പൂണ്ടെത്രയോ
ദുഷ്ടത്തരങ്ങള്‍ ചെയ്തു കൂട്ടുന്നവന്‍

അധികാര ഗര്‍വ്വിലിതര ശബ്ദങ്ങളെ -
യില്ലായ്മ ചെയ്യുവാന്‍ വെമ്പല്‍ കൊള്ളുന്നവന്‍

അഴിമതിക്കറവീണ കനഹസിംഹാസന-
മിളകാതിരിക്കുവാനാധിപൂണ്ടലയുവോന്‍

നേരിന്‍റെനെറുകയില്‍ മുള്ളാണി വയ്ക്കുവാന്‍
ചുങ്കം കൊടുത്താളു കൂട്ടുന്നവന്‍

മോഹഭംഗങ്ങള്‍ വൃദ്ധാലയം പൂകവേ
ബലിച്ചോറുരുളയില്‍ മേനി കാട്ടുന്നവന്‍

കണ്ണടച്ചെല്ലാമിരുട്ടാക്കി മാറ്റി നാ-
മിനിയെത്ര ദൂരമീ യാത്ര തുടരണം?.

ഉണരട്ടെ ധര്‍മ്മബോധമൊരു വിപ്ലവാഗ്നിയായ്‌-
എരിഞ്ഞടങ്ങട്ടെ തിന്മയും തീവ്രവാദങ്ങളും.

- രാധാകൃഷ്ണന്‍ കൊല്ലങ്കോട്‌.